నువ్వు

ఉదయాన్నే నిద్రపొరల్లోకి దూరి
మేల్కొలిపే ఉదయ సంగీతానివి
చురుక్కున కనురెప్పలపై గిల్లి
అల్లరిగా వెక్కిరించే వెలుగు కిరణానివి
ఇహ మొదలు మనిద్దరి మౌన సంభాషణా

జారిపోతున్న చీర కుచ్చిళ్ళ సవరింపులో
ఎందుకబ్బా నీ చూపుల గిలిగింత
వేడి కాఫీ ఎంత బాగుంటే మాత్రం
నువ్వు తాగలేదన్న దిగులెందుకు?

అద్దం ముందు అరనిముషం ముక్తాయింపుకు
అడిగానా నీ సలహాలేమైనా?
ఇక్కడ బుగ్గపై ఈ పుట్టుమచ్చ
అక్కడ కంటి కొసన అంటని కాటుక రేఖ అంటూ
నెన్నుదుటన అంత పెద్ద బొట్టా
చిన్న దోసగింజ చాలదూ
నాపెదవుల నిర్లక్షం తగునా నీకంటూ '
గులాబీలు పూయించే నీ వేలి కొసలు
ఆలస్యం అయితేనేం
చూపుల బంగారం నా చిట్టి తల్లికంటూ
నిశ్శబ్దంగా పెదవులాంచి ఓ దిష్టి చుక్క
తగునా ఈ వశీకరణ?
తత్తరపాటు పరుగుల్లో వెనకెనకే రోజంతా
కనిపించని నీడలా